Бразилия терма жамоаси ва «Реал»нинг афсонавий ҳимоячиси Роберто Карлос фаолияти давомида допинг истеъмол қилганликда гумонланмоқда.

Яқинда германиянинг ARD телеканали журналисти Хайо Зеппельт томонидан Бразилия футболидаги допинг ҳақида ҳужжатли фильм суратга олинди.

Унда маълум қилинишича, Карлос кўп йиллар давомида бразилиялик шифокор Жулио Сезар Алвеснинг мижози бўлган. У эса ўз амалиётида допингдан кенг миқёсда фойдаланган.

Sportschau хабарига кўра, ARD журналисти қўлида Алвеснинг қинғир ишларини тасдиқловчи 200дан ортиқ ҳужжат бор. Бундан ташқари, фильмда Алвеснинг Роберто Карлос ҳақидаги сўзлари ҳам келтирилган. Унда шифокор: «Роберто Карлос 15 ёшга тўлганида унинг оёқларини ҳозирги кўринишига келтириб қўйганман» - деб айтган.

Ҳозирча, футболчининг ўзи ва вакиллари ARD фильмида келтирилган далилларга изоҳ беришдан бош тортмоқда.