«Реал» ва Бразилия терма жамоасининг собиқ юлдузи Роберто Карлос допинг истеъмол қилганини инкор қилди.

Германиянинг ARD телеканали Бразилия футболидаги допинг муаммосига бағишланган ҳужжатли фильмни намойиш этиб, футболчини тақиқланган моддаларни истеъмол қилганликда айблаган эди.

«ARD каналининг бу баёнотини инкор қиламан. Мен ҳеч қачон допинг истеъмол қилмаганман. Фильмда мени бир шифокор билан боғлаб тасвирлашган. Аммо мен уни танимайман. Энди ҳуқуқшуносим бу иш билан шуғулланади. Биз барча айбловларни судда исботланишини талаб қиламиз.

Ўз фаолиятим давомида мен ҳалоллик тамойилларига амал қилганман. 20 йиллик фаолиятимда бирор марта допинг истеъмол қилганим тасдиқланмаган. Мен Бразилия, Италия, Испания, Туркия, Россия, Ҳиндистон клубларида ўйнаганман. Бразилия терма жамоаси сафида дунёни кезганман. Ҳар доим допинг назоратидан ўтганман. Агар допинг истеъмол қилганимда, албатта бу аниқланган бўларди» - деб ёзди Роберто Карлос фейсбук саҳифасида.