"Челси" ярим ҳимоячиси Неманья Матич "Манчестер Юнайтед" таклиф олиши мумкин.
Goal.com тарқатган хабарга кўра, 28 ёшли сербиялик футболчига Жозе Моуриньо қизиқиш билдирмоқда. Португалиялик мураббий "Монако" ярим ҳимоячиси Фабиньонинг трансферидан воз кечишга қарор қилди ва эътиборини Матич томон қаратди. Жозенинг фикрича, Матич "МЮ" марказида Поль Погба ва Андер Эррера билан яхши тил топишиб кетади.
"Челси" клуби эса "Монако"дан Тьемуе Бакайокони харид қилиш борасида деярли келишувга эришганига қарамай, Матични сотмоқчи эмас.
Неманья оилавий сабабларга кўра Лондондан Манчестерга кўчиб ўтишга тайёр эмас, аммо клублар ўзаро келишувга эришсалар, у мазкур трансферга қаршилик билдирмайди.
Маълумотларга қараганда, Неманья Моуриньо билан яхши муносабатга эга. Мураббий "Челси"да ишлаб юрган пайтда — 2014 йилда футболчини "Бенфика"дан харид қилганди.
Матич ушбу мавсумда "Челси" сафида жами 40та ўйин ўтказиб, 2та гол урди. Transfermarkt унинг трансфер нархини 35 млн еврога баҳолаган.