Ўзбекистонлик Равшан Эрматов Конфедерациялар кубоги -2017 мусобақасида видеоҳакам сифатида фаолият олиб боради.
Бугун ҳамюртимиз «Спорт-экспресс» сайти журналисти саволларига жавоб бераркан, янги технологияларнинг жорий қилиниши ҳакамларга бўлган босимнинг камайишига олиб келишини айтди.
- Видеоҳакам ёрдамидан фойдаланадиган бош ҳакам хотиржамликка берилиб қолиши муминми?
- Бу ҳакамнинг ўзига боғлиқ. Мисол учун, агар видеоҳакамлар хизматидан фойдалансам ҳам, ҳеч қачон хотиржамликка берилмайман. Ҳамма нарсани ўзим ҳал этишга ҳаракат қиламан.
- Ҳакамларга руҳий босим камаядими?
- Албатта! Катта мусобақаларда ҳакамлар кучли босим остида ишлайди. Мана шу туфайли янада кўпроқ хатога йўл қўйиши ҳеч гап эмас. Видео-ёрдамчиларнинг пайдо бўлиши ҳакамлар ишини енгиллаштиради, улар сал енгилроқ нафас ола бошлайди.
- Қачондан буён ҳакамлар замонавий футболчиларнинг тезлигидан ортда қола бошлади?
- Бир вақтлар ҳакамларнинг хатосига ўйиннинг бир қисми сифатида хотиржам муносабат билдирилган. Ҳозир эса ҳакамлардан катта хатоларга йўл қўймаслик талаб қилинмоқда.
- Фаолиятингизда катта хатоларга йўл қўйганмисиз, улар тушингизга кириб чиққанми?
- Хатолар ҳар бир ўйинда юз беради. Биз уларни таҳлил қиламиз. Энг муҳими ўйиннинг тақдири ва мусобақалар тақдирига таъсир қиладиган хатоларга йўл қўймаслик.
- Бунақа хатолардан сўнг, ҳакамларнинг виждони қийналадими?
- Гап виждонда эмас. У бизни ҳеч қачон тарк этмайди. Шунчаки, бу ерда инсон омили мавжуд. Вазиятни кўрмай қолиш мумкин. Қандай ишлашимизни кўрган бўлсангиз керак. Ҳатто футболчилар ҳам ўйинга бундай пухта тайёргарлик кўрмайди.
