O‘zbekistonlik Ravshan Ermatov Konfederasiyalar kubogi -2017 musobaqasida videohakam sifatida faoliyat olib boradi.
Bugun hamyurtimiz «Sport-ekspress» sayti jurnalisti savollariga javob berarkan, yangi texnologiyalarning joriy qilinishi hakamlarga bo‘lgan bosimning kamayishiga olib kelishini aytdi.
- Videohakam yordamidan foydalanadigan bosh hakam xotirjamlikka berilib qolishi muminmi?
- Bu hakamning o‘ziga bog‘liq. Misol uchun, agar videohakamlar xizmatidan foydalansam ham, hech qachon xotirjamlikka berilmayman. Hamma narsani o‘zim hal etishga harakat qilaman.
- Hakamlarga ruhiy bosim kamayadimi?
- Albatta! Katta musobaqalarda hakamlar kuchli bosim ostida ishlaydi. Mana shu tufayli yanada ko‘proq xatoga yo‘l qo‘yishi hech gap emas. Video-yordamchilarning paydo bo‘lishi hakamlar ishini yengillashtiradi, ular sal yengilroq nafas ola boshlaydi.
- Qachondan buyon hakamlar zamonaviy futbolchilarning tezligidan ortda qola boshladi?
- Bir vaqtlar hakamlarning xatosiga o‘yinning bir qismi sifatida xotirjam munosabat bildirilgan. Hozir esa hakamlardan katta xatolarga yo‘l qo‘ymaslik talab qilinmoqda.
- Faoliyatingizda katta xatolarga yo‘l qo‘yganmisiz, ular tushingizga kirib chiqqanmi?
- Xatolar har bir o‘yinda yuz beradi. Biz ularni tahlil qilamiz. Eng muhimi o‘yinning taqdiri va musobaqalar taqdiriga ta’sir qiladigan xatolarga yo‘l qo‘ymaslik.
- Bunaqa xatolardan so‘ng, hakamlarning vijdoni qiynaladimi?
- Gap vijdonda emas. U bizni hech qachon tark etmaydi. Shunchaki, bu yerda inson omili mavjud. Vaziyatni ko‘rmay qolish mumkin. Qanday ishlashimizni ko‘rgan bo‘lsangiz kerak. Hatto futbolchilar ham o‘yinga bunday puxta tayyorgarlik ko‘rmaydi.
