ЖЧ-2018 финали ва теннис бўйича Уимблдон турнирининг финал баҳси бир хил вақтга тўғри келиб қолгани аниқланди.
2018 йилда Россия мезбонлик қиладиган Жаҳон чемпионатининг финал ўйини 15 июль куни Тошкент вақти билан соат 20:00да бошланади. Шу куни 18:00да эса теннис бўйича Уимблдон мусобақасининг эркаклар ўртасидаги ҳал қилувчи беллашуви старт олади.
Англиянинг BBC ҳамда Япониянинг NHK телеканаллари мазкур вазиятдан норози бўлиб, ЖЧ финали санаси ёки вақтини ўзгартиришни сўраб, ФИФАга мурожаат қилди. Халқаро футбол уюшмаси бу сўровга рад жавобини берди. Ташкилот мулозимларининг фикрига кўра, финал учун танланган вақт футбол аудиторияси учун жуда мос ва у ўзгармайди.
BBC телекомпаниясининг хавотири шундаки, мундиал финалида Англия терма жамоаси, Уимблдон финалида эса британиялик Энди Маррей кортга чиқиши мумкин. Бу ҳолатда телеканал катта даромад келтириши мумкин бўлган трансляциянинг биридан воз кечиши керак бўлади.
