Тошкентнинг «Обод» футбол клуби фаолиятини тугатган. Бироқ жамоа бу борада ПФЛга расмий мактуб йўлламаган.

«Обод»нинг кейинги тақдири ПФЛ жим тургани учун ҳам номаълумлигича қолмоқда. Аввалроқ Тошкент жамоаси ўзига тегишли бўлган футболчиларга жавоб бериб, уларни эркин агентга айлантиргани айтилганди.

Нашрнинг қайд этишича, ўз вақтида Ўзбекистон миллий терма жамоасига чақирилган ҳужумчи Павел Соломин «Обод» учун хориждан ҳомийлар топгани катта эҳтимол. «Обод» тасарруфида бўлган корхона фаолиятини тугатган бўлса-да, янги ҳомий унинг Олий лигадаги тайёр ўрнига эга чиқиши мумкин.

Бугда гап айнан қайси ҳомийлар ҳақида кетаётгани айтилмаган. Аввалроқ футбол агенти Санъат Шарипов Павел Соломиннинг ҳам шу соҳада меҳнат қилаётгани ҳақида айтиб ўтганди.

Бунгача Ўзбекистон миллий терма жамоаси бош мураббийи Самвел Бабаян ҳам «Обод» раҳбарияти билан учрашиб, клубни қўлга киритиш истагида борлигини айтгани ҳақида хабарлар чиққанди.