Ўзбекистон олимпия терма жамоаси 23 ёшгача бўлган футболчилар ўртасидаги Осиё чемпионати саралаш босқичидан муваффақиятли ўтди.

Равшан Ҳайдаров шогирдлари “D” саралаш гуруҳининг сўнгги турида Бирлашган Араб Амирликлари терма жамоасига қарши майдонга чиқдилар. Баҳснинг 67-дақиқасида бурчакдан етказилган узатмани ҳимоячимиз Исломжон Қобилов бош билан дарвозага жойлаб қўйди.

Бундан ташқари, тўп назорати ҳамда вазиятлар яратиш бўйича кичик устунлик ўзбекистонликлар томонида бўлди. Забиҳилло Ўринбоев ва Одил Ҳамробеков яккама-якка вазиятлардан самарали фойдалана олишмади. Баҳснинг сўнгги дақиқасида Жавоҳир Сиддиқов ўнг қанотдан етказилган тўпни кучли зарба билан дарвоза тўққизлигига жойлаб, чиройли гол муаллифига айланди ва ўйин тақдирини узил-кесил ҳал қилди.

Ўзбекистон U23 терма жамоаси саралаш босқичидаги учала ўйинда ғалаба қозониб, келаси йили Хитойда бўлиб ўтадиган Осиё чемпионати йўлланмасини қўлга киритди.

ОФК U23 саралаш босқичи, “D” гуруҳи, 3-тур
БАА U23 – ЎЗБЕКИСТОН U23 – 0:2 (0:0)
Гол: Исломжон Қобилов (67), Жавоҳир Сиддиқов (90)
БАА U23: Бусанда, Рашид, Саъдий, Абдулбосит, Иброҳим, Ҳашмий, Алакбарий, Ҳаммадий, Занҳаний, Саид, Каъбий
Ўзбекистон U23: Ботирали Эргашев, Ислом Қобилов, Акром Комилов, Достон Турсунов, Аббос Отахонов, Азиз Ғаниев, Жасур Яхшибоев, Жавоҳир Сидиқов, Одил Ҳамробеков, Шароф Муҳитдинов, Забиҳилло Ўринбоев