O‘zbekiston olimpiya terma jamoasi 23 yoshgacha bo‘lgan futbolchilar o‘rtasidagi Osiyo chempionati saralash bosqichidan muvaffaqiyatli o‘tdi.
Ravshan Haydarov shogirdlari “D” saralash guruhining so‘nggi turida Birlashgan Arab Amirliklari terma jamoasiga qarshi maydonga chiqdilar. Bahsning 67-daqiqasida burchakdan yetkazilgan uzatmani himoyachimiz Islomjon Qobilov bosh bilan darvozaga joylab qo‘ydi.
Bundan tashqari, to‘p nazorati hamda vaziyatlar yaratish bo‘yicha kichik ustunlik o‘zbekistonliklar tomonida bo‘ldi. Zabihillo O‘rinboyev va Odil Hamrobekov yakkama-yakka vaziyatlardan samarali foydalana olishmadi. Bahsning so‘nggi daqiqasida Javohir Siddiqov o‘ng qanotdan yetkazilgan to‘pni kuchli zarba bilan darvoza to‘qqizligiga joylab, chiroyli gol muallifiga aylandi va o‘yin taqdirini uzil-kesil hal qildi.
O‘zbekiston U23 terma jamoasi saralash bosqichidagi uchala o‘yinda g‘alaba qozonib, kelasi yili Xitoyda bo‘lib o‘tadigan Osiyo chempionati yo‘llanmasini qo‘lga kiritdi.
OFK U23 saralash bosqichi, “D” guruhi, 3-tur
BAA U23 – O‘ZBEKISTON U23 – 0:2 (0:0)
Gol: Islomjon Qobilov (67), Javohir Siddiqov (90)
BAA U23: Busanda, Rashid, Sa’diy, Abdulbosit, Ibrohim, Hashmiy, Alakbariy, Hammadiy, Zanhaniy, Said, Ka’biy
O‘zbekiston U23: Botirali Ergashev, Islom Qobilov, Akrom Komilov, Doston Tursunov, Abbos Otaxonov, Aziz G‘aniyev, Jasur Yaxshiboyev, Javohir Sidiqov, Odil Hamrobekov, Sharof Muhitdinov, Zabihillo O‘rinboyev
