Теннисчи аёллар ўртасида норасмий жаҳон чемпионати ҳисобланган Fed Cup, яъни Федерация кубогининг иккинчи саралаш босқич баҳслари бошланди.
Ирода Тўлаганова бошқарувидаги Ўзбекистон термаси мазкур босқичда туркманистонлик теннисчиларга қарши кортга чиқди.
Яккалик баҳсларида иштирок этган биринчи ракеткамиз Сабина Шарипова Гулжон Мухаммадкулиевани 6:1, 6:0 ҳисобида мағлубиятга учратди. Камола Умарова эса рақиби Жаҳона Байрамовани 6:2, 6:0 ҳисобида таслим қилди.
Жуфтлик баҳсларида Нигина Абдураимова ва Оқгул Омонмуродова туркманистонлик рақибларини қийинчиликсиз 6:0, 6:2 ҳисобида мағлуб этишди.
Шу тариқа, Ўзбекистон термаси умумий ҳисобда 3:0 ҳисобидаги ғалабани қўлга киритди. Унинг кейинги рақиби Янги Зеландия терма жамоаси бўлади.
