Испания чемпионатининг 2-тури доирасида "Реал" Мадридда "Валенсия"ни қабул қилди ва кутилмаганда очко йўқотди. Ушбу ўйинда Зидан марказий ҳимоя билан боғлиқ муаммога дуч келгани ўз таъсирини ўтказмай қолмади.

Учрашувнинг 10-дақиқасида меҳмон ҳимоячиларининг қўпол хатосидан сўнг Асенсио тўпни эгаллаб олди ва 17 метрдан чиройли зарба билан ҳисобни очди. Орадан 8 дақиқа ўтиб ҳисоб тенглашди. "Валенсия"нинг чап қанот бўйлаб ташкил этган ҳужуми пайтида мадридликлар ўз дарвозабон майдончалари ичида Солерни кўздан қочиришди. Натижада "кўршапалаклар" аъзоси осонлик билан дарвозани ишғол қилди.

Маҳоратли футболчилардан ташкил топган "Қироллик клуби" ўйин давомида жуда кўп вазиятлар яратиб, улардан фойдалана олмади. Аксинча, баҳс тугашига 13 дақиқа қолганида чап қанотдан уюштирилган ҳужум оқибатида Кондогбия "Валенсия"ни ҳисобда олдинга олиб чиқди. Орадан кўп ўтмасдан Асенсио жарима зарбасини қойилмақом тарзда голга айлантирди.

Ўйин сўнгида мезбонлар ғалабани ўз томонларига оғдиришлари мумкин эди, аммо Бензема ўта қулай 2та имкониятдан фойдалана олмади. Дастлаб у 6-7 метрдан дарвозага аниқ зарба бера олмаган бўлса, Каримнинг кейинги зарбасини "Валенсия" посбони қайтаришга муваффақ бўлди.

Шу тариқа, Зидан жамоаси Испания чемпионатининг 2-туридаёқ 2 очкодан маҳрум бўлди.

Испания Ла лигаси, 2-тур
Реал Мадрид – Валенсия 2:2 (1:1, 1:1)
28 август, 01.15, «Сантьяго Бернабеу»
Голлар: 1:0 – 10 Асенсио, 1:1 – 18 Солер, 1:2 – 77 Кондогбиа, 2:2 – 83 Асенсио.
Реал Мадрид – Навас, Карвахаль, Каземиро, Начо, Марсело, Модрич, Кроос (Майораль, 84), Иско (Ковачич, 46), Бэйл (Васкес, 74), Бензема, Асенсио.
Валенсия – Нето, Монтойя (Начо Видаль, 75), Рубен Везу, Мурильо, Тони Лато (Начо Хиль, 83), Солер, Парехо, Кондогбиа, Гайя, Дзадза, Родриго (Санти Мина, 88).
Огоҳлантиришлар: Монтойя (49), Начо (53), Каземиро (61), Парехо (66), Карвахаль (72), Родриго (81), Солер (84), Дзадза (90).