Польша терма жамоаси ҳужумчиси Роберт Левандовски ЖЧ-2018 саралаши доирасида Арманистонга қарши кечган ва 6:1 ҳисобидаги ғалаба билан якунланган учрашувда 3та гол урди.
Шу тариқа «Бавария» футболчиси жаҳон чемпионати учун саралашда ўтказилган 9 ўйинда урган голлари сонини 15тага етказди. Бу эса Жаҳон чемпионати саралашида Европа минтақасидаги янги рекорд ҳисобланади.
Бундан аввалги рекорд германиялик Герд Мюллер ва португалиялик Кришитану Роналдуга тегишли эди (14тадан гол). Роналдуда Левандовскини бомбардирлар пойгасида қувиб ўтиб, янги рекорд ўрнатиш учун иккита ўйин бор (Андорра ва Швейцария терма жамоаларига қарши ўйинлар), польшалик футболчи ҳам яна бир учрашувда ўз имкониятини синаб кўради (Черногорияга қарши Варшавадаги ўйин).
