Хабарингиз бўлса керак, жорий мавсум бир нечта ҳамюртларимиз фаолиятини Малайзия чемпионатида давом эттирмоқда. Андижонлик 28 ёшли футболчи Бобур Акбаров бу йил илк бор ўзини хориж чемпионатида синаб кўрмоқда. Айтиш керакки, Акбаровнинг хориждаги дебют мавсуми омадли чиқди. Боиси унинг жамоаси «Куала-Лумпур» Малайзия премьер лигасида чемпионлик шохсупасига кўтарилди. Кеча премьер лиганинг сўнгги тур ўйинлари бўлиб ўтди. Акбаровнинг жамоаси бўлмиш «Куала-Лумпур» сафарда «Джохор ДТ»га қарши баҳс олиб 1:0 ҳисобида мағлуб бўлди. Аммо шунга қарамай Куала-лумпурликлар чемпионатни якунда 1-ўринда тугатиб, келаси йил супер лигада иштирок этиш хуқуқини қўлга киритди.

Эътиборлиси Бобур Акбаров бу йил жамоаси таркибида деярли барча учрашувларида тўлиқ иштирок этиб, ўз олдига қўйилган мақсадига эришишида муносиб хисса қўшди. 

Айтишларича, «Куала-Лумпур» футбол клуби раҳбарияти Бобур Акбаров билан ўртадаги шартномани яна узайтириш таклифини билдирган. Айни дамда томонлар бу борада ўзаро музокара олиб бормоқда.