Кеча JFL in Tashkent футбол мактабига Германиядаги JFL in Schlotheim мактаби катта мураббийи Хералд Фритц ташриф буюрди ва семинар бошланди. Ўзбек мураббийлари билан қисқа танишувдан сўнг, биринчи куннинг асосий мавзуси эълон қилинди.
Семинарнинг дастлабки кунида Хералд Фритц томонидан футбол учрашуви бўлиб ўтадиган кунда болалар билан олиб бориладиган ишларга асосий эътибор қаратилди. Бу жараённи немис мураббийи уч босқичга бўлди - ўйиндан олдин, ўйин вақтида ва ўйиндан сўнг бажариладиган ишлар.
ЎЙИНДАН ОЛДИН - болалар мураббий ҳар қандай ҳолатда ҳам майдон ҳолатини ўрганиб чиқиши шарт. Сўнгра болалар билан майдон ҳолати ва бўлажак ўйин ҳақида яна бир бор гаплашиб олинади. Ҳар доим ўйиндан олдин форма, экипировка, ичимлик ва тиббий ёрдамни тайёрлаб қўйиш лозим. Ота оналар билан ҳар доим мулоқотда бўлиб туриш лозим.
ЎЙИН ВАҚТИДА - мураббий ўйин вақтида болаларни руҳан қўллаши керак. Уларга эркинлик, ижодкорлик ва мустақил қарор қабул қилиш имконини бериш шарт. Дриблинг ишлатиб, тўпни йўқотган болани уришиб, сўкиш мутлақо керак эмас. Бу фақат унинг зарарига ишлайди ва руҳий жароҳат келтиради. Лозим бўлган тақдирда ўйиндан сўнг тўғри тушунтириш мумкин бўлади. Кейин болалар ҳам ўзаро бир-бирини камситмаслиги лозим. Мураббий бунга йўл қўймаслиги керак.
Танаффус вақтида болаларга дам олиш имконини бериш ва енгил кўрсатма бериб ўтиш керак.
ЎЙИНДАН КЕЙИН – мураббий болалар билан бирга стадионни тозалаб кетиш лозим. Бу уларни шахс сифатида тарбиялашда муҳим аҳамият касб этади. Болалар ўзидан кейин ёмон нарсалар қолдирмаслиги лозим. Бу – тарбия.
Мағлубиятга учралган ўйиндан сўнг болаларни руҳан қўллаш лозим. Ўйин таҳлилини эса икки-уч кундан сўнг қилган маъқул. Танқидни фақат енгилидан бошлаш лозим.
Хералд Фритц томонидан биринчи кун ўтилган дарснинг қисқача мазмуни шундан иборат бўлди. Бундан ташқари, ушбу жараён амалиётда қандай қўлланиши кераклиги кўрсатиб ўтилди. Немис мураббийи JFL in Tashkent футбол мактабида 20 кун давомида семинар ўтказади ва барча дарслар мазмуни www.jfl-tashkent.uz сайти орқали ёритиб борилади.
Эслатиб ўтамиз, JFL in Tashkent футбол мактабига 5 ёшдан 14 ёшгача бўлган болалар қабули давом этмоқда.
Мурожаат учун телефонлар: +99895 1959890, 83712689438, +99890 9999890
Расмий сайт: www.jfl-tashkent.uz
Email: info@jfl-tashkent.uz
