«Манчестер Юнайтед» клуби ярим ҳимоячиси Генрих Мхитарян Дортмунднинг «Боруссия» жамоасига қайтиши мумкин, деб хабар бермоқда The Times газетаси.
Нашрнинг тарқатган хабарига кўра, Англия клуби 28 ёшли арманистонлик футболчини сотишга қарши эмас ва 2016 йилда унинг трансферига ишлатилган пулнинг бир қисмини қайтариб олмоқчи. Агарда манкунианликлар футболчини сотишга қарор қилса «Боруссия» клуби уни ўз сафига қўшиб олиш учун асосий даъвогар бўлади.
«Манчестер Юнайтед» бош мураббийи Моуринью бир неча кун аввал Мхитарянни очиқчасига танқид қилган ва ўз савиясида ўйин намойиш этмаётганидан нолиган эди.
Мхитарян «Боруссия» клуби сафида 2013 йилдан то 2016 йилгача тўп сурган, шундан кейин 26,3 миллион евро эвазига «МЮ» сафига келиб қўшилган. Ушбу мавсум Генрих умумий ҳисобда 15 та учрашувда майдонга тушиб, иккита гол ва бешта голли узатма амалга оширган.
