Дортмунднинг «Боруссия» клуби январь ойида ўзининг энг яхши ҳужумчиси бўлмиш Пьер-Эмерик Обамейянгни сотишга тайёр, деб хабар бермоқда Bild нашри.
Нашр тарқатган хабарга кўра, немис клуби бундай ишни амалга оширишга 28 ёшли футболчининг сўнгги кунлардаги ўзини тутиши сабаб бўлмоқда. «Боруссия» клуби футболчи эвазига 60 миллион евро миқдорда нарх белгилаб қўйган ва жамоа унинг ўрнига футболчи қидиришни бошлаб юборган.
Ўтган ҳафта «Боруссия» жамоаси Бундеслига доирасида «Штутгарт»га қарши баҳс юритган (1:2) ва унда Обамейянг таркибга киритилмаган эди. Бунинг асосий сабаби этиб футболчининг машғулотларга кечикиши кўрилмоқда. Пьер 14:20да келган, машғулотлар эса 14:00да бошланиши режалаштирилган.
Ўйинчи асосий таркибга Чемпионлар Лигаси доирасида «Тоттенхэм» клубига қарши ўйинда қайтган ва битта гол муаллифи бўлди. Ушбу мавсум ҳужумчи Германия чемпионатида 16 учрашувда майдонга тушиб, 12та гол ва битта голли узатма амалга оширган.
