Хабарингиз бор, эртага 1 декабрь куни Россия Федерацияси пойтахти Москва шаҳридаги Кремль саройида 2018 йилги Жаҳон чемпионатига қуръа ташлаш маросими бўлиб ўтади.
Маросимни таниқли россиялик телебошловчи Мария Командная ва англиялик собиқ футболчи Гари Линекер олиб боришади. 32та терма жамоани гуруҳларга бўлишда уларга Пеле, Диего Марадона, Фабио Каннаваро, Диего Форлан каби футбол афсоналари ва юлдузлари ёрдам беришади.
Юртимиздаги миллионлаб футбол мухлисларининг қизиқишларидан келиб чиққан ҳолда, “UzReport TV” телеканали Жаҳон чемпионати 2018 га қуръа ташлаш маросими трансляция ҳуқуқини харид қилди. Эртага Тошкент вақти билан соат 20:00дан бошлаб “UzReport TV” ҳамда “Futbol TV” телеканалларида қуръа ташлаш маросим жонли эфирда намойиш қилинади.
Дунёнинг 32та кучли терма жамоаси мундиалнинг гуруҳ босқичидаги ўз рақибларини билиб олишади.
Жаҳон чемпионати 2018га қуръа ташлаш маросимини ўтказиб юборманг!