ЖЧ-2018 саралашининг плей-оффида Шимолий Ирландия ва Швейцария ўртасидаги биринчи учрашувни бошқарган ҳакам Овидиу Хацеган майдон эгалари дарвозасига пенальтини нотўғри белгилаганини тан олди.
Ўйин 9 ноябрь куни Бельфастда бўлиб ўтган эди. Ҳакам Корри Эвансни қўл билан ўйнади деб топди, аммо такрорий лавҳада тўп футболчининг елкасига теккани ойдинлашади. 11 метрли жаримани Рикардо Родригес аниқ бажаради ва бу гол ҳар икки ўйинда ягоналигича қолади. Натижада Швейцария Россияда бўлиб ўтадиган ЖЧ-2018 мусобақасига йўл олади.
Шимолий Ирландия термаси бош мураббийи Майкл О'Нил буни "узоқ муддатли фаолияти давомида гувоҳ бўлган энг ёмон ҳакам қарори" деб атади.
"Бу мен учун қайғули ва ёқимсиз вазият. Жуда афсусдаман, чунки мен шундай хатога йўл қўйдим. Албатта, бу плей-оффга катта таъсир қилди. Бу сир эмас, мен ўз фикримни яширмайман. Аммо мен кучли инсонман, бу босимни ойлам ёрдамида енгиб ўтдим", - дейди руминиялик ҳакам.
