Хитойда давом этаётган Осиё чемпионатида Ўзбекистон Олимпия терма жамоаси ўз тарихида биринчи марта чорак финалга чиққани ҳақида хабар қилгандик.

Терма жамоамизнинг чорак финалдаги рақиби маълум бўлди. "B" гуруҳида якунига етган 3-тур ўйинида Япония КХДР терма жамоасини 3:1 ҳисобида мағлубиятга учратди ва 9 очко жамғарган ҳолда гуруҳда биринчи ўринни қўлга киритди.

19 январь куни Осиё чемпионати чорак финалида Ўзбекистон Олимпия терма жамоаси "А" гуруҳининг 2-ўриндаги жамоаси сифатида Японияга қарши баҳс олиб борадиган бўлди. Учрашув Тошкент вақти билан соат 13:00да бошланади.

Эслатиб ўтамиз, 2017 йилнинг декабрь ойида Тайландда бўлиб ўтган Халқаро мусобақа финалида Равшан Ҳайдаров шогирдлари айнан мана шу Япония терма жамоасига қарши баҳс олиб бориб, асосий вақтда 2:2 ҳисобида дуранг қайд этишганди. Пенальтилар сериясида эса Ўзбекистон терма жамоаси дарвозабони ишончли ўйин намойиш қилиб, вакилларимиз Халқаро мусобақа ғолибига айланишганди.