25 январь куни Ўзбекистон футбол федерацияси ўзининг навбатдан ташқари конференциясини ўтказади. Унга катта эҳтимол билан Hyatt Regency Tashkent меҳмонхонаси мезбонлик қилади.
Бунга қадар ЎФФ президенти сифатида ишлаб келаётган Умид Аҳмаджонов кеча — 16 январь куни Миллий олимпия қўмитаси президенти этиб сайланди. Шу тариқа Аҳмаджоновнинг ЎФФдаги кейинги фаолияти қандай бўлиши борасидаги саволлар пайдо бўлди.
Аҳмаджоновнинг маълумот беришича, ЎФФнинг 25 январь кунги навбатдан ташқари конференциясида мана шу масалага ойдинлик киритилади.
«Дарё»нинг ЎФФдаги манбаси хабарига кўра, шу куни ташкилот президенти ва вице-президентлари алмашиши ҳам мумкин. Бироқ Аҳмаджонов ташрифидан кейин бошланган ишлар шу йўсинда давом этади ва тўхтаб қолмайди. МОҚ президенти бўлган Аҳмаджоновнинг ўзи ҳам катта эҳтимол билан ЎФФ структурасидаги фаолиятини давом эттиради.
