Бугун Хитойнинг Чангжоу шаҳрида 23 ёшгача бўлган футболчилар ўртасидаги Осиё чемпионатининг финал баҳси бўлиб ўтади. Вьетнамга қарши ўйин олдидин Ўзбекистон терма жамоаси ярим ҳимоячиси Одилжон Ҳамробеков ўз фикрларини билдириб ўтди.

"Ҳар бир учрашувдан кейин ўз ўйинларимизни таҳлил қилиб бордик. Мураббийлар штаби ва футболчилар хатоларимизни англаб, уларни бартараф этиш устида ишладик. Гуруҳ босқичидан чиқиб олганимиздан кейин биз учун ортга йўл йўқ эди. Гуруҳ босқичида хатони тўғрилаш мумкин эди, аммо плей-офф босқичида ҳар бир хато қимматга тушарди. Шунинг учун жиддий тайёргарлик кўрдик. Ўйлайманки, плей-офф босқичидаги ўйинларимиз мухлисларимизга маъқул келди.

Шунча ҳаракат қилиб, финалгача етиб келдик. Юртдошларимиз биздан максимал натижа кутяпмиз. Финалда боримизни бериб ўйнаб, чемпионликни қўлга киритмоқчимиз. Бу орқали ватандошларимизни хурсанд қилмоқчимиз", — деди Ҳамробеков.

Эслатиб ўтамиз, финал ўйини Вьетнам U23 ва Ўзбекистон U23 терма жамоалари ўртасида Тошкент вақти билан 13:00да бошланади.