“Навбаҳор” жамоаси мавсумлар оралиғидаги селекция ишларини давом эттирмоқда. Айнан шу мақсадда таркибга икки нафар янги футболчи жалб этилди. Россиялик дарвозабон Илья Гаврилов ва ўтган мавсумни “Пахтакор”да ўтказган ҳужумкор ярим ҳимоячи Беҳруз Саъдиллаевлар шулар жумласидандир.

Гаврилов 2017 йилги мавсумни Волгограднинг “Ротор” клубида ўтказган. Ушбу футболчилар “Навбаҳор”да кўрикдан ўтишмоқда. Уларнинг хатти ҳаракатлари мураббийларга манзур бўлса “Навбаҳор” аъзосига айланишлари мумкин.

Олдинроҳ жамоамиз машғулотларига қўшилган россиялик футболчи Ацамаз Бураевга эса жавоб берилди. Шу ўринда, “Навбаҳор”га футболчиларни жалб этиш борасида музокараларни давом этаётганлигини қўшимча қилиш жоиз.

Бугун Тошкент йиғинида навбатдаги назорат учрашувида “Навбаҳор” “Сўғдиёна” билан куч синашди. Ўйиннинг биринчи бўлимида дарвозаларга гол киритилмаган бўлса танаффусдан кейин томонлар бир мартадан муваффақият қозонишди.

Дастлаб, Даврон Одилов жиззахликларни олдинга олиб чиққан бўлса кейинчалик Азизбек Турғунбоев ҳисобни тенглаштирди. Учрашув давомида футболчилари гол уриш учун кўплаб имкониятларга эга бўлишсада, вазиятларни голга айлантира олишмади.

“Навбаҳор” учрашувни қуйидаги таркибга ўтказди: Илья Гаврилов, Авазбек Маматхўжаев, Мирзощид Ғофуров, Жаҳонгир Меҳмонов, Дарко Станоевич, Аъзам Алиев, Дилшод Жабборов, Ойбек Қиличев, Аюбхон Нўъмонов, Азизбек Турғунбоев, Беҳруз Саъдиллаев.

Захирадан майдонга тушганлар: Зоҳир Пиримов, Илҳом Бойдедаев, Остон Ўрунов, Яннис Линда, Шоҳзамон Ҳайруллаев.

“Сўғдиёна”га қарши учрашувда Дилшод Шарофиддинов ва Азамат Алланиёзовларда кичик жароҳат борлиги сабабли майдонга туша олишмади. “Навбаҳор” навбатдаги назорат ўйинини 31 январь куни “Андижон” жамоасига қарши ўтказади.

"Навбаҳор" ФК матбуот хизмати.