“Navbahor” jamoasi mavsumlar oralig‘idagi seleksiya ishlarini davom ettirmoqda. Aynan shu maqsadda tarkibga ikki nafar yangi futbolchi jalb etildi. Rossiyalik darvozabon Ilya Gavrilov va o‘tgan mavsumni “Paxtakor”da o‘tkazgan hujumkor yarim himoyachi Behruz Sa’dillayevlar shular jumlasidandir.

Gavrilov 2017 yilgi mavsumni Volgogradning “Rotor” klubida o‘tkazgan. Ushbu futbolchilar “Navbahor”da ko‘rikdan o‘tishmoqda. Ularning xatti harakatlari murabbiylarga manzur bo‘lsa “Navbahor” a’zosiga aylanishlari mumkin.

Oldinroh jamoamiz mashg‘ulotlariga qo‘shilgan rossiyalik futbolchi Asamaz Burayevga esa javob berildi. Shu o‘rinda, “Navbahor”ga futbolchilarni jalb etish borasida muzokaralarni davom etayotganligini qo‘shimcha qilish joiz.

Bugun Toshkent yig‘inida navbatdagi nazorat uchrashuvida “Navbahor” “So‘g‘diyona” bilan kuch sinashdi. O‘yinning birinchi bo‘limida darvozalarga gol kiritilmagan bo‘lsa tanaffusdan keyin tomonlar bir martadan muvaffaqiyat qozonishdi.

Dastlab, Davron Odilov jizzaxliklarni oldinga olib chiqqan bo‘lsa keyinchalik Azizbek Turg‘unboyev hisobni tenglashtirdi. Uchrashuv davomida futbolchilari gol urish uchun ko‘plab imkoniyatlarga ega bo‘lishsada, vaziyatlarni golga aylantira olishmadi.

“Navbahor” uchrashuvni quyidagi tarkibga o‘tkazdi: Ilya Gavrilov, Avazbek Mamatxo‘jayev, Mirzoshid G‘ofurov, Jahongir Mehmonov, Darko Stanoyevich, A’zam Aliyev, Dilshod Jabborov, Oybek Qilichev, Ayubxon No‘’monov, Azizbek Turg‘unboyev, Behruz Sa’dillayev.

Zaxiradan maydonga tushganlar: Zohir Pirimov, Ilhom Boydedayev, Oston O‘runov, Yannis Linda, Shohzamon Hayrullayev.

“So‘g‘diyona”ga qarshi uchrashuvda Dilshod Sharofiddinov va Azamat Allaniyozovlarda kichik jarohat borligi sababli maydonga tusha olishmadi. “Navbahor” navbatdagi nazorat o‘yinini 31 yanvar kuni “Andijon” jamoasiga qarshi o‘tkazadi.

"Navbahor" FK matbuot xizmati.