Бугун, 5 февраль куни Португалия ва Мадриднинг “Реал” клуби ҳужумчиси Криштиану Роналду 33 ёшни қаршилади.
Профессионал футболчилик фаолиятини 2002 йил Лиссабоннинг “Спортинг” жамоасида бошлаган Роналду 1985 йилнинг 5 февраль куни Мадейра райони пойтахти Фуншалда таваллуд топган.
2003 йил катта футболга қадам ташлаган Криштиану Англиянинг “Манчестер Юнайтед” клубига келиб қўшилади ва “қизил иблислар” футболчиси сифатида 6 йил тўп суради.
Роналду шунча давр мобайнида расмий учрашувларда 196 марта майдонга тушади ва 84 та гол уришга эришади. Футболчининг ёшлигидаги севимли жамоаси “Бенфика” бўлиб, у ҳозирча бу клуб либосини кийишга улгурмади.
Шундай қилиб, Роналду 2009 йилнинг ёзида “Манчестер Юнайтед”дан “Реал”га 93,4 миллион еврога кўчиб ўтади ва ўша вақтда трансфер бозоридаги рекордни янгилайди.
Роналдунинг трансферидан аввал 2001 йил Зинеддин Зидан (ҳозирда “Реал” мураббийи) “Ювентус”дан “қироллик клуби” таркибига келиб қўшилган бўлади.
Фаолияти давомида кўплаб совринларни қўлга киритган футболчи айни вақтда “Реал” клуби шарафини ҳимоя қилмоқда ва фаолиятини Испанияда якунлашни истайди.
Маълумотларга кўра, мадридликлар ҳужумчининг йиллик маошини 30 миллион еврога кўтаришади ва Рони бу борада асосий рақобатчиси Лионель Месси билан тенглашиб олади.
Шунингдек, бугун яна бир иқтидорли бразилиялик футболчи Неймар ҳам 26 ёшини қаршиламоқда. “ПСЖ” ҳужумчиси айни вақтда дунёнинг энг қиммат футболчиси бўлиб, у ўтган йил ёзда “Барселона”дан 222 миллион евро эвазига Париж жамоасига ўтганди.
Маълумот учун, Роналдунинг жамоаси “Реал” 15 февраль куни Европа Чемпионлар лигасининг 1/8 финал босчичида Неймарнинг “ПСЖ” клуби билан тўқнаш келади. Жавоб баҳси эса 7 март куни Парижда бўлиб ўтади.
