Bugun, 5 fevral kuni Portugaliya va Madridning “Real” klubi hujumchisi Krishtianu Ronaldu 33 yoshni qarshiladi.
Professional futbolchilik faoliyatini 2002 yil Lissabonning “Sporting” jamoasida boshlagan Ronaldu 1985 yilning 5 fevral kuni Madeyra rayoni poytaxti Funshalda tavallud topgan.
2003 yil katta futbolga qadam tashlagan Krishtianu Angliyaning “Manchester Yunayted” klubiga kelib qo‘shiladi va “qizil iblislar” futbolchisi sifatida 6 yil to‘p suradi.
Ronaldu shuncha davr mobaynida rasmiy uchrashuvlarda 196 marta maydonga tushadi va 84 ta gol urishga erishadi. Futbolchining yoshligidagi sevimli jamoasi “Benfika” bo‘lib, u hozircha bu klub libosini kiyishga ulgurmadi.
Shunday qilib, Ronaldu 2009 yilning yozida “Manchester Yunayted”dan “Real”ga 93,4 million yevroga ko‘chib o‘tadi va o‘sha vaqtda transfer bozoridagi rekordni yangilaydi.
Ronalduning transferidan avval 2001 yil Zineddin Zidan (hozirda “Real” murabbiyi) “Yuventus”dan “qirollik klubi” tarkibiga kelib qo‘shilgan bo‘ladi.
Faoliyati davomida ko‘plab sovrinlarni qo‘lga kiritgan futbolchi ayni vaqtda “Real” klubi sharafini himoya qilmoqda va faoliyatini Ispaniyada yakunlashni istaydi.
Ma’lumotlarga ko‘ra, madridliklar hujumchining yillik maoshini 30 million yevroga ko‘tarishadi va Roni bu borada asosiy raqobatchisi Lionel Messi bilan tenglashib oladi.
Shuningdek, bugun yana bir iqtidorli braziliyalik futbolchi Neymar ham 26 yoshini qarshilamoqda. “PSJ” hujumchisi ayni vaqtda dunyoning eng qimmat futbolchisi bo‘lib, u o‘tgan yil yozda “Barselona”dan 222 million yevro evaziga Parij jamoasiga o‘tgandi.
Ma’lumot uchun, Ronalduning jamoasi “Real” 15 fevral kuni Yevropa Chempionlar ligasining 1/8 final boschichida Neymarning “PSJ” klubi bilan to‘qnash keladi. Javob bahsi esa 7 mart kuni Parijda bo‘lib o‘tadi.
