Пхёнчханда старт олган XXIII қишки Олимпия ўйинлари доирасида бугун, 12 февраль куни мамлакат пойтахти Сеулда Корея Республикаси маданият, спорт ва туризм вазирлиги томонидан спорт вазирлари Конференцияси ташкил этилди. Унда Ўзбекистон Миллий олимпия қўмитаси президенти ва мамлакат футбол ассоциациясининг биринчи вице-президенти Умид Аҳмаджонов иштирок этди.

Конференциянинг бош мавзуси “Жамиятда спорт қадриятларини ривожлантириш” бўлиб, мазкур анжуман иштирокчиларга допингларсиз тоза спорт, ижтимоий ривожланишда спортнинг аҳамияти, спорт мусобақаларидаги ғирромликларни олдини олиш, спорт қадриятларини ривожлантириш каби масалаларда мисоллар келтириш, фикр алмашиш имконини берди.

Конференцияни дастлаб Корея Республикаси маданият, спорт ва туризм вазири До Жонг Ван кириш нутқи билан очиб берди. Шундан сўнг иштирокчи мамлакатлар спорт мутассадилари ўз тақдимотларини ўтказишди. Конференцияда кўпгина масалалар муҳокама қилинди. Анжуман якунида эса иштирокчиларга маданий дастур намойиш этиб берилди.

Конференциядан сўнг Умид Аҳмаджонов шу ернинг ўзида Бутунжаҳон антидопинг агентлиги (WADA) президенти Крейг Риди, шунингдек, Корея Республикаси маданият, спорт ва туризм ишлари вазири До Жонг Ван билан учрашди.

Учрашувда томонлар ўртасида ўзаро дўстона алоқалар ўрнатиш, Олимпия ҳаракактини янада ривожлантириш масаласида ҳамкорлик риштараларини мустаҳкамлаш борасида келишиб олинди.

Шунингдек, WADA Президенти Крейг Риди суҳбат давомида мамлакатимизда допинга қарши кураш масаласида олиб борилаётган ишларни юқори баҳолади. Муҳтарам Президентимиз томонидан 2018 йил 3 январда эълон қилинган ПҚ-3457 сонли “Ўзбекистон Республикаси Вазирлар Маҳкамаси ҳузуридаги Миллий антидопинг агентлиги фаолиятини ташкил этиш тўғрисида”ги қарори бу борада муҳим қадам бўлишини таъкидлаб ўтди.

Умид Аҳмаджонов ўз навбатида Бутунжаҳон антидопинг агентлиги раҳбарини юртимизга таклиф этди. Крейг Риди бу таклифни бажонидил қабул қилди ва иш тақвимидан келиб чиққан холда WADA Президентининг Ўзбекистонга яқин ойлар ичида ташриф буюришига оид келишувга эришилди.

Ўзбекистон Миллий олимпия қўмитаси матбуот хизмати