Англия чемпионати учинчи дивизиони вакили бўлмиш “Уиган” Англия кубоги доирасида “Манчестер Сити”ни мағлуб этди ва мусобақадан чиқариб юборди.
Бу “Уиган”нинг Кубок мусобақасидаги АПЛда иштирок этувчи учинчи жамоа устидан қозонган ғалабаси бўлди. Жорий мавсумда клуб “шаҳарликлар”дан олдин “Борнмут” ва “Вест Хэм”ни ҳам мусобақадан чиқариб юборганди.
Шундай қилиб, “Уиган” битта Кубок мусобақасида АПЛнинг учта клубини мусобақадан чиқариб юборган иккинчи жамоага айланди. Ундан олдин бундай натижани “Миллуолл” клуби қайд этганди. Қизиғи, иккинчи жаҳон урушидан кейин ҳали бирорта қуйи лига вакили Кубок мусобақасида учтадан ортиқ АПЛ клубини мағлуб этмаган. Агар “Уиган” кейинги турда “Саутгемптон”ни ҳам мағлуб этса, мутлақ рекорд ўрнатади.
