Бильбао шаҳрида Европа лигаси баҳслари доирасидаги учрашув арафасида футбол ишқибозлари ўртасида рўй берган тўқнашув натижасида испан полициячиси ҳалок бўлди. Бу ҳақда «Euronews» хабар бермоқда.
Низо Москванинг «Спартак» ҳамда маҳаллий футбол клубларининг мухлислари ўртасида келиб чиққан. Россиядан келган юзлаб ишқибозлар ўйин ўтказиладиган стадионда тартисизлик юзага келтиришга уринишган.
Таъкидланишича, айнан россияликлар «Атлетик Бильбао» мухлисларига ҳамда стадиондаги хавфсизлик ходимларига ташланишган. Ҳалок бўлган полициячи бошқа ҳуқуқни муҳофаза қилувчи идоралар вакиллари билан биргаликда футбол фанатлари ўртасидаги келишмовчиликни бартараф этишга киришган чоғда қурбон бўлгани айтилмоқда.
Маҳаллий ОАВнинг хабар беришича, россияликлар кўчадаги бир қанча ахлат идишларини ағдариб баррикада ясашган. Улар ёнаётган петардаларни шиша идишларни улоқтиришган. Хабарда қайд этилишича, Москва футбол клубининг 5 нафар ишқибози ҳибсга олинган.
