Наманган шаҳридаги 15-сонли футбол бўйича давлат ихтисослаштирилган мактаб-интернатига қарашли “Ёш куч” стадионида Ўзбекистон Жисмоний тарбия ва спорт вазирлиги тасарруфидаги футбол бўйича давлат ихтисослаштирилган мактаб-интернатларининг 2006 йилда туғилган ўқувчилари ўртасида республика очиқ турнири старт олди.
Мусобақанинг очилиш маросимида Наманган вилоят футбол ассоциацияси биринчи вице-президенти Баҳром Холмирзаев, “Навбаҳор” ПФК директори Акрамжон Дедабаев, “Навбаҳор” жамоаси бош мураббийи Илҳом Мўминжонов, шунингдек, мазкур мусобақада иштирок этаётган футбол мактаб-интернатларининг вакиллари, мураббийлар, ёш футболчилар иштирок этишди.
Республика очиқ турнирида Самарқанд, Жиззах, Фарғона, Андижон, Наманган вилоятлари, шунингдек, Сирдарё вилоятининг Янгиер шаҳри, Тошкент вилоятининг Янгийўл шаҳри, Тошкент шаҳрининг “Пахтакор” ва ФДИМИ, Андижон вилоятининг Шаҳрихон шаҳри, Учқўрғон туманининг ДИМИ, Наманган шаҳар 15-ДИМИнинг 1 ва 2-жамоалари, жами 12та жамоа иштирок этмоқда.
