Бугун 30 март куни Ўзбекистон футбол Ассоциацияси ташаббуси билан Осиё футбол конфедерацияси (ОФК) аёллар кунига бағишланган анъанавий футбол фестивали бўлиб ўтди.
Фестивалда Тошкент шаҳрининг барча туманларидан 8-10 ёшдаги 200 нафардан ортиқ қизлар иштирок этди.
Ўқувчи қизлар 8 гуруҳга бўлинган ҳолда футбол ўйинининг асосий элементлари – эстафета, тўпни олиб юриш, тўпни ўзаро ошириш, назорат қилиш каби йўналишлар бўйича машғулотларда иштирок этишди. Ҳар бир гуруҳга ажратилган малакали мураббийлар уларга йўл йўриқ кўрсатиб туришди.
Фестивални ўтказишдан асосий мақсад болалар спортини ривожлантириш ва оммалаштириш, ёшларда футболга бўлган қизиқишни уйғотиш ҳамда соғлом турмуш тарзини илгари суришдан иборат эканлигини ҳам алоҳида таъкидлаш керак.
Фестивал якунида иштирокчиларга сертификатлар тақдим қилинди.
