Ирода самараси. Сервер Жепаровнинг клуби - «Истиқлол» Эрон Про-лигаси 26-тури доирасида «Нафт» меҳмони бўлиб, ирода эвазига ғалаба қозонди. Яъни ҳисобни мезбонлар очишгач, теҳронликлар ҳужумга зўр бериб, ўйин якунида 2та гол урган ҳолда, ортга 3 очко билан қайтишди.
Одатдагидек, бошланғич таркибда майдонга тушган Сервер ҳам ушбу натижага имкон қадар ҳисса қўшди. Шу билан «Истиқлол»нинг очколари сони 44тага етди ва жамоа турнир жадвалининг 2-ўрнида. Тўғри, теҳронликлар пешқадам - «Пирузи»дан 13 очко ортда қолмоқдалар.
Ўхшамаса қийин-да... «Чанчун Ятаи» - «Гуанжоу Фули» ўйини (Хитой Суперлигаси 4-тури) мезбон жамоа сафидаги Анзур Исмоиловга асло татимагани аниқ. Зеро, «Ятаи» яхши имкониятларга эга бўла туриб, якунда 1:2 ҳисобида ютқазди. Боз устига, ҳамюртимизнинг жамоадошлари нақ 2та пенальтидан фойдалана олишмади.
Анзурнинг ўзига келсак, у омадсиз учрашувда тўлиқ вақт ҳаракатланди. Хуллас, «Чанчун Ятаи»нинг ғалабасиз серияси давом этмоқда. Клуб ҳисобида 2та дуранг ва шунча мағлубият бор. Хитойдаги яна бир вакилимиз Одил Аҳмедов эса4-тур ўйинида қарама-қарши таассуротлар оғушида қолди.
Биринчидан унинг клуби - «Шанхай СИПГ» ўз майдонида «Чонконг Лифан»ни 2:1 ҳисобида доғда қолдириб, ғалабали сериясини давом эттирди (4та ўйин - 4та ғалаба). Иккинчидан, «СИПГ»нинг биринчи голига айнан ҳамюртимиз ассистентлик қилди. Бироқ Одил 85-дақиқада қизил карточка олди. Демак, у Суперлиганинг кейинги турида шанхайликларга ёрдам беролмайди.
Жаноб Сёмин, Денисовга имкон берсангиз-чи? Россия Премьер-лигасида чемпионликни кўзлаётган «Локомотив» 24-тур ўйинида ўта муҳим очколарни бой берди. «Темирйўлчилар» аутсайдерлардан бири - «Амкар»га бас келолмадилар - 1:2.
Энг ачинарлиси, жамоа бош мураббийи Юрий Сёмин терма жамоамиз ҳимоячиси Виталий Денисовга ҳамон имконият бермаяпти. «Локомотив»нинг мағлубиятидан «Спартак» унумли фойдаланди.
Яъни пешқадамнинг энг яқин таъқибчиси ўз майдонида «Тосно»ни 2:1 ҳисобида енгиб, ўртадаги очколар фарқини 2тага туширди (тўғри, «Локо» захирасида 1та ўйин бор). Пойтахтдаги ўйинда меҳмонлар ярим ҳимоячиси Вагиз Галиулин тўлиқ вақт ҳаракатланганини айтиш жоиз. Достон Ҳамдамов эса«Анжи»да 2-ўйинини ўтказди.
Ҳамюртимиз бошланғич таркибда майдонга тушиб, 69-дақиқага қадар тўп сурган баҳсда махачқалъаликлар сафарда «Краснодар»дан очко тортиб олишди - 1:1. «Ростов» сафидаги Элдор Шомуродов клубининг ўз майдонида ЦСКАга қарши кечган мағлубиятли ўйини (1:2)да қатнашгани йўқ.
Қайдномада ҳам йўқ. «Жубило Ивата»Япония элит лигасининг 5-турида ҳам ғалаба нашидасини сурди, бироқ Фозил Мусаевсиз. Қисқаси, ҳамюртимиз 2:1 ҳисобида якунланган«Урава Редс»га қарши уй учрашувининг қайдномасига ҳам киритилмади.
