Iroda samarasi. Server Jeparovning klubi - «Istiqlol» Eron Pro-ligasi 26-turi doirasida «Naft» mehmoni bo‘lib, iroda evaziga g‘alaba qozondi. Ya’ni hisobni mezbonlar ochishgach, tehronliklar hujumga zo‘r berib, o‘yin yakunida 2ta gol urgan holda, ortga 3 ochko bilan qaytishdi.
Odatdagidek, boshlang‘ich tarkibda maydonga tushgan Server ham ushbu natijaga imkon qadar hissa qo‘shdi. Shu bilan «Istiqlol»ning ochkolari soni 44taga yetdi va jamoa turnir jadvalining 2-o‘rnida. To‘g‘ri, tehronliklar peshqadam - «Piruzi»dan 13 ochko ortda qolmoqdalar.
O‘xshamasa qiyin-da... «Chanchun Yatai» - «Guanjou Fuli» o‘yini (Xitoy Superligasi 4-turi) mezbon jamoa safidagi Anzur Ismoilovga aslo tatimagani aniq. Zero, «Yatai» yaxshi imkoniyatlarga ega bo‘la turib, yakunda 1:2 hisobida yutqazdi. Boz ustiga, hamyurtimizning jamoadoshlari naq 2ta penaltidan foydalana olishmadi.
Anzurning o‘ziga kelsak, u omadsiz uchrashuvda to‘liq vaqt harakatlandi. Xullas, «Chanchun Yatai»ning g‘alabasiz seriyasi davom etmoqda. Klub hisobida 2ta durang va shuncha mag‘lubiyat bor. Xitoydagi yana bir vakilimiz Odil Ahmedov esa4-tur o‘yinida qarama-qarshi taassurotlar og‘ushida qoldi.
Birinchidan uning klubi - «Shanxay SIPG» o‘z maydonida «Chonkong Lifan»ni 2:1 hisobida dog‘da qoldirib, g‘alabali seriyasini davom ettirdi (4ta o‘yin - 4ta g‘alaba). Ikkinchidan, «SIPG»ning birinchi goliga aynan hamyurtimiz assistentlik qildi. Biroq Odil 85-daqiqada qizil kartochka oldi. Demak, u Superliganing keyingi turida shanxayliklarga yordam berolmaydi.
Janob Syomin, Denisovga imkon bersangiz-chi? Rossiya Premyer-ligasida chempionlikni ko‘zlayotgan «Lokomotiv» 24-tur o‘yinida o‘ta muhim ochkolarni boy berdi. «Temiryo‘lchilar» autsayderlardan biri - «Amkar»ga bas kelolmadilar - 1:2.
Eng achinarlisi, jamoa bosh murabbiyi Yuriy Syomin terma jamoamiz himoyachisi Vitaliy Denisovga hamon imkoniyat bermayapti. «Lokomotiv»ning mag‘lubiyatidan «Spartak» unumli foydalandi.
Ya’ni peshqadamning eng yaqin ta’qibchisi o‘z maydonida «Tosno»ni 2:1 hisobida yengib, o‘rtadagi ochkolar farqini 2taga tushirdi (to‘g‘ri, «Loko» zaxirasida 1ta o‘yin bor). Poytaxtdagi o‘yinda mehmonlar yarim himoyachisi Vagiz Galiulin to‘liq vaqt harakatlanganini aytish joiz. Doston Hamdamov esa«Anji»da 2-o‘yinini o‘tkazdi.
Hamyurtimiz boshlang‘ich tarkibda maydonga tushib, 69-daqiqaga qadar to‘p surgan bahsda maxachqal’aliklar safarda «Krasnodar»dan ochko tortib olishdi - 1:1. «Rostov» safidagi Eldor Shomurodov klubining o‘z maydonida SSKAga qarshi kechgan mag‘lubiyatli o‘yini (1:2)da qatnashgani yo‘q.
Qaydnomada ham yo‘q. «Jubilo Ivata»Yaponiya elit ligasining 5-turida ham g‘alaba nashidasini surdi, biroq Fozil Musayevsiz. Qisqasi, hamyurtimiz 2:1 hisobida yakunlangan«Urava Reds»ga qarshi uy uchrashuvining qaydnomasiga ham kiritilmadi.
