Миллий Олимпия қўмитаси мамлакатимизда яккакураш спорт турлари бўйича янги, жамоавий мусобақаларга асос солмоқда. Ўзбекистон Республикаси Президентининг 2018 йил 5 мартдаги “Жисмоний тарбия ва спорт соҳасида давлат бошқаруви тизимини тубдан такомиллаштириш чора-тадбирлари тўғрисида”ги ПФ-5368-сонли Фармони, шунингдек, Ўзбекистон Республикаси Президентининг 2017 йилнинг 9 мартдаги “Ўзбекистон спортчиларини 2020 йил Токио (Япония)да бўлиб ўтадиган XXXII ёзги Олимпия ҳамда XVI Паралимпия ўйинларига тайёргарлик кўриш тўғрисида”ги ПҚ-2821-сонли Қарори ижросини таъминлаш мақсадида Қўмита томонидан “Олимпия келажаги” номи остида спортнинг яккама-якка кураш турлари бўйича жамоавий мусобақалар ўтказиш режалаштирилган.
Мусобақалар дзюдо, спорт курашлари, бокс ва таэквондо WTF спорт турлари бўйича ташкил этилади. Мазкур беллашувлар орқали Миллий олимпия қўмитаси ёшлар орасида истеъдодли спортчиларни саралаб олиш, спорт турлари бўйича вилоят терма жамоаларини шакллантириш, мамлакат миллий терма жамоаларига муносиб заҳира яратиш, шунингдек, республиканинг барча ҳудудларида спортчиларнинг тайёргарлик даражасини ўрганишни мақсад қилган.
“Олимпия келажаги” мусобақаси старт олиши арафасида эртага, 6 апрель куни Миллий олимпия қўмитаси конференц-залида юқорида номлари санаб ўтилган спорт федерациялар раҳбарияти, мураббийлар, юлдуз спортчилар ва журналистлар иштирокида катта матбуот анжумани ташкил қилинади. Анжуман соат 11:00да бошланади. Оммавий ахборот воситаларининг турли соҳаларида ижод қилаётган қалам аҳлини мазкур тадбирга таклиф этамиз.
