Туниснинг Ҳаммамед шаҳрида таэквондо (WTF) бўйича ўсмирлар ўртасида жаҳон чемпионати бўлиб ўтмоқда.

Мусобақанинг иккинчи кунида ўғил болалар ўртасида -51 ва -55кг, қизлар ўртасида эса -46 ва -49 кг вазн тоифаларида жанглар ўтказилди.

Жаҳон чемпионатида -51 кг вазн тоифасида юртимиз шарафини ҳимоя қилган Улуғбек Рашидов совриндорлар қаторидан ўрин олишга муваффақ бўлди. У дастлабки босқичларда бразилиялик Габриэл Альвес (25:5), малайзиялик Имон Фирдавс Насриддин (25:7), нимчорак финалда грециялик Дикаиос Мичалакакос (25:13), чорак финалда эса россиялик Анатолий Иаринни (18:8) мағлуб этди ва ярим финал йўлланмасини қўлга киритди. Финал йўлланмаси учун бўлган курашда Улуғбек эронлик Амир Валипурга 11:17 ҳисобида имкониятни бой бериб қўйди ва бронза медали билан чегараланди. Эронлик спортчи финалда озарбайжонлик Хонўғлон Каримовдан устун келиб, олтин медал соҳибига айланлигини қўшимча қилиб ўтишимиз жоиз.

Эслатиб ўтамиз, чемпионатнинг биринчи куни -45 кг вазн тоифасида баҳсларда иштирок этган спортчимиз Амирбек Тўраев шоҳсупанинг иккинчи поғонасидан ўрин олганди.

Жаҳон чемпионати 13 апрель куни якунига етади.

Маълумот учун, Улуғбек Рашидов яқиндагина Хаммамедда бўлиб ўтган лицензион турнирда олтин медалга сазовор бўлиб, III ўсмирлар Олимпия ўйинларига йўлланмани қўлга киритганди. У мураббий Собир Назаралиевнинг шогирди ҳисобланади.