Суперлига 6-тури доирасидаги "Сўғдиёна" - "Навбаҳор" жамоалари учрашувидан сўнг ўтказилган матбуот анжуманининг биринчи қисмида наманганликлар бош мураббийи Илҳом Мўминжонов иштирок этди. У ўз фикрларини қуйидагича билдирди:
“Гарчи учрашув давомида 2та тўп фарқи билан олдинда борган бўлсакда, ўйин якунланишига 15 дақиқа қолганида мезбонлар ўз характерларини намойиш этиб, якунда иродали ғалабага эришдилар. Майдон эгалари бунга тўла ҳақли эдилар. Чунки шогирдларим сўнгги дақиқаларда концентрацияни йўқотиб қўйишди. Оқибатда кетма-кет голлар ўтказиб юбордик.
Менимча, баҳснинг биринчи бўлимида йигитлар чиройли ўйин намойиш этишмади. Шунчаки 2та вазиятда омадлари келиб, жиззахликлар дарвозасини ишғол қилишга муваффақ бўлишди. Майдон эгалари биринчи бўлимда ҳам 2-3 марта гол уриш имкониятига эга бўлишди ва биздан анча устунлик қилишди. Шунингдек, мезбонлар шижоат кўрсатишди. “Сўғдиёна” футболчиларининг майдонга ғалаба учун тушишгани кўринди. Шогирдларим эса ўз имкониятлари даражасида тўп суришди”.
