Superliga 6-turi doirasidagi "So‘g‘diyona" - "Navbahor" jamoalari uchrashuvidan so‘ng o‘tkazilgan matbuot anjumanining birinchi qismida namanganliklar bosh murabbiyi Ilhom Mo‘minjonov ishtirok etdi. U o‘z fikrlarini quyidagicha bildirdi:
“Garchi uchrashuv davomida 2ta to‘p farqi bilan oldinda borgan bo‘lsakda, o‘yin yakunlanishiga 15 daqiqa qolganida mezbonlar o‘z xarakterlarini namoyish etib, yakunda irodali g‘alabaga erishdilar. Maydon egalari bunga to‘la haqli edilar. Chunki shogirdlarim so‘nggi daqiqalarda konsentrasiyani yo‘qotib qo‘yishdi. Oqibatda ketma-ket gollar o‘tkazib yubordik.
Menimcha, bahsning birinchi bo‘limida yigitlar chiroyli o‘yin namoyish etishmadi. Shunchaki 2ta vaziyatda omadlari kelib, jizzaxliklar darvozasini ishg‘ol qilishga muvaffaq bo‘lishdi. Maydon egalari birinchi bo‘limda ham 2-3 marta gol urish imkoniyatiga ega bo‘lishdi va bizdan ancha ustunlik qilishdi. Shuningdek, mezbonlar shijoat ko‘rsatishdi. “So‘g‘diyona” futbolchilarining maydonga g‘alaba uchun tushishgani ko‘rindi. Shogirdlarim esa o‘z imkoniyatlari darajasida to‘p surishdi”.
