Дортмунднинг «Боруссия» клуби ҳужумчиси Миши Батшуайи бундеслиганинг 30-турида «Шальке»га қарши кечган ўйинда (0:2) жароҳат олди.

Ўйин охирида Бенжамен Стамбули билан тўқнашувдан кейин 24 ёшли бельгиялик футболчи ўрнидан кўтарила олмади ва уни замбилга солиб майдондан олиб кетишди.

Шифохонадаги илк текширувдан кейин, Батшуайи тўпиқ суяклари синишидан қутулиб қолгани маълум бўлган, аммо у мавсумнинг қолган ўйинларида, ҳатто 2018 йилги жаҳон чемпионатида иштирок этиши ҳам сўроқ остида қолган.

Айни вақтда немис клубида ижарада бўлган, трансфер ҳуқуқи «Челси»га тегишли бўлган бу футболчи чуқур текширувдан ўтказилади, шундан сўнг унинг жароҳатига хулоса берилади, футболчи болдир суяги билан товон суягини бириктирувчи бўғинни шикастлаб олган бўлиши мумкин.

«Кўринишидан, у тезда сафга қайтмайди. Умид қиламанки, мен хато гапирмоқдаман», – деган ўйиндан кейин «Боруссия» мураббийи Петер Штегер.

Бундеслигага келгач Батшуайи 10 ўйинда майдонга тушди ва 7 гол уриб, 1 голга пас берди.