Таиланднинг Бангкок шаҳрида давом этаётган бокс бўйича ёшлар ўртасида ўтаётган Осиё чемпионатида финал беллашувларида ҳозирча вакилларимиз биттадан олтин ва кумуш медалини қўлга киритди.

Вакилларимиз иштирокидаги илк жангда Самандар Холмуродов (52 кг) мезбонлар вакили Суктет Суравет билан кучи синашди.

Кескин ва муросасиз ўтган беллашув якунларига кўра, таиландлик спортчи очколар бўйича ғолиб чиқиб, Осиё чемпионига айланди. Самандар эса кумуш медал билан тақдирланди.

Шунингдек, яна бир тўқнашувда Абдумалик Халоков (56 кг) филиппинлик Кристиан Лаурент Питтни синовдан ўтказди. Мазкур қарама-қаршиликда Абдумалик ўз устунлигини намойиш этиб, Осиё чемпиони деган номга сазовор бўлди.

Эслатиб ўтамиз, вакилларимиз иштирокидаги навбатдаги беллашувлар кечки дастурдан ўрин олган. Унда уч нафар боксчимиз рингга чиқади.