"Локомотив" – "Қизилқум" (2:2) учрашувидан сўнг ўтказилган матбуот анжуманида "темирйўлчилар" жамоаси бош мураббийи вазифасини бажарувчи Андрей Фёдоров ҳамда ўйиннинг энг яхши футболчиси Икром Алибоев иштирок этишди.
- Биз бундан яхшироқ ўйнашимиз лозим эди. Биринчи бўлиб гол ўтказиб юборсак, рақиб жамоалар кўпинча ёпиқ ўйин кўрсата бошлашяпти. Бу эса ҳужум қилаётган жамоага қийинчлик туғдиради. Агар ҳар икки жамоа ҳам очиқ ўйин намойиш этса, ўйин ҳам томошабопроқ кечади. Ислом Тўхтахўжаев кичик жароҳат борлиги сабабли алмаштирилди. Йўқса унинг ўрнига олдинги чизиқни кучайтирган бўлардик.
Ёзда таркибни кучайтирамиз, албатта. Фақат келадиган ўйинчининг савияси бизникилардан юқорироқ бўлиши лозим. Кореялик Чо Сук Жаега эса жавоб бердик. Ушбу футболчи бизнинг мамлакатимизга кўника олмади. У ўз тилида сўзлашадиган футболчи йўқлиги сабабдан ҳам бироз қийналди, - деди тажрибали мутахассис.
- Учрашув анча қийин ўтди. "Қизилқум" анча яхши ўйин кўрсатди. Биз эса ўз ўйинимизни намойиш эта олмадик. Бугун биз мағлубиятга тенглаштирса бўладиган дуранг ўйнадик, - деди Икром Алибоев.
