"Lokomotiv" – "Qizilqum" (2:2) uchrashuvidan so‘ng o‘tkazilgan matbuot anjumanida "temiryo‘lchilar" jamoasi bosh murabbiyi vazifasini bajaruvchi Andrey Fyodorov hamda o‘yinning eng yaxshi futbolchisi Ikrom Aliboyev ishtirok etishdi.

- Biz bundan yaxshiroq o‘ynashimiz lozim edi. Birinchi bo‘lib gol o‘tkazib yuborsak, raqib jamoalar ko‘pincha yopiq o‘yin ko‘rsata boshlashyapti. Bu esa hujum qilayotgan jamoaga qiyinchlik tug‘diradi. Agar har ikki jamoa ham ochiq o‘yin namoyish etsa, o‘yin ham tomoshaboproq kechadi. Islom To‘xtaxo‘jayev kichik jarohat borligi sababli almashtirildi. Yo‘qsa uning o‘rniga oldingi chiziqni kuchaytirgan bo‘lardik. 

Yozda tarkibni kuchaytiramiz, albatta. Faqat keladigan o‘yinchining saviyasi biznikilardan yuqoriroq bo‘lishi lozim. Koreyalik Cho Suk Jayega esa javob berdik. Ushbu futbolchi bizning mamlakatimizga ko‘nika olmadi. U o‘z tilida so‘zlashadigan futbolchi yo‘qligi sababdan ham biroz qiynaldi, - dedi tajribali mutaxassis.

- Uchrashuv ancha qiyin o‘tdi. "Qizilqum" ancha yaxshi o‘yin ko‘rsatdi. Biz esa o‘z o‘yinimizni namoyish eta olmadik. Bugun biz mag‘lubiyatga tenglashtirsa bo‘ladigan durang o‘ynadik, - dedi Ikrom Aliboyev.