Қизиқарли кечиши кутилаётган навбатдаги жаҳон чемпионати бошланишига кўп вақт қолмади. Терма жамоаларнинг якуний рўйхати эълон қилинмоқда. Бир нечта жаҳон футболида ўз ўрнига эга бўлган ўйинчилар Мундиалга бора олмайдиган бўлди. Уларнинг айримлари ҳақида тўхталиб ўтамиз.
Марсьяль — Франция терма жамоаси («Манчестер Юнайтед»)
Тўғри, Марсьяль бу мавсум захирада кўпроқ ушланиб қолди. Лекин унинг нималарга қодир эканлигини ҳамма мураббийлар жуда яхши билишади. Ҳужумнинг исталган позициясида ўйнай оладиган универсал форвард Францияга мундиалда қўл келиши мумкин эди. Дешамнинг танловини ҳурмат қилмасдан иложимиз йўқ. Лекин, унинг бу қарори кейинчалик кўп муҳокама қилинмаса бўлгани!
Ража Наингголан — Бельгия терма жамоаси («Рома»)
Римнинг «Рома»сида фантастик мавсум ўтказган тажовузкор ярим ҳимоячи ҳозирда Европа топ-клубларининг эътибор марказида турибди. Майдон марказидаги жуда ҳам ишончли ўйинлари, ақлбовар қилмас зарбалари эвазига унинг ошиқлари тобора кўпайиб бормоқда. Унинг ўзи эса «Рома»дан кетишни хоҳламаяпти. Бельгия терма жамоаси бош мураббийи Роберто Миртинес билан ўртадаги келишмовчилик сабабли у Россия мундиалидан четда қоладиган бўлди. Терма жамоа якуний рўйхати эълон қилингач, Наингголан халқаро фаолиятини якунланганини эълон қилди. Чамамда, бу қарордан унинг ўзи ҳам жиндек хафа бўлган бўлса ажаб эмас!
Альваро Мората — Испания терма жамоаси («Челси»)
Баланд бўйли классик ҳужумчилар сирасига кирадиган Мората мундиалсиз қолганига кўпчилик ҳайрон қолди. ЖЧ-2018га кетаётган Яго Аспасдан кўра унинг терма жамоа учун фойдаси кўпроқ тегарди, деган фикр кўпчиликнинг хаёлидан ўтган бўлса керак. Бу мавсум туманли альбионда ўзини йўқотиб қўймаган Мората Аспасда йўқ бир жуда муҳим жиҳатга эга эди. Бу — катта ўйинларда ўзини йўқотиб қўймаслик. Унинг карьерасида жуда кўп кескин бурилишлар бўлгани етмаганидек, энди Мундиалдан ҳам четда қолди. Лопатеги бу қарори учун кейин афсусланмаса бўлгани!
Уэйн Руни — Англия терма жамоаси («Эвертон»)
Кўпчиликнинг бу танловдан ҳайрон бўлаётганини тушунса бўлади. Лекин Руни бироз ёши ўтиб қолса ҳам, омадсиз мавсум ўтказган бўлса ҳам, у барибир Руни! У сўнгги дақиқаларда майдонга тушган бўлса ҳам терма жамоа учун фойдали эди. Унинг инглизлар учун Уэлбекдан кўра кўпроқ фойдаси теккан бўлар эди. Чунки Рунининг фантастик тажрибаси ва совуққонлигидан Россия яшил майдонларида қўл келиши мумкин эди.
Маркос Алонсо («Челси»), Эктор Бельерин («Арсенал») — Испания терма жамоаси
Бу икки шоввоз туманли албионда ўзининг позициясида деярли тенгсиз. Иккаласига ҳам «Реал»дан ва «Барса»дан жиддий таклифлар бор. Энг қизиғи, фойдали иш коэффициенти бўйича Бельерин Начо Монреалдан анча яхши статистикага эга. Алонса эса «Челси»нинг алмаштириб бўлмас ўйинчилари қаторига кириб бўлди. Бирданига икки ўйинчини қайд этганимизнинг сабаби иккаласи ҳам ҳеч бўлмаса чемпионатга бориш учун ҳақли эдилар. Лекин қарорни мураббий чиқаради ва унга ўзи жавоб беради.
Яҳёхўжа УЛУҒХЎЖАЕВ
