Суперлиганинг15-тури доирасидаги Наманганнинг “Навбаҳор” ҳамда Қўқоннинг “Қўқон-1912” жамоалари ўртасидаги “водий дербиси” учрашувидан олдин ҳар икки жамоа вакиллари ўртасида йиғилиш бўлиб ўтди.
Унда бўлажак баҳсни яхши ташкил қилишда ёрдам берадиган турли масалалар учрашув назоратчиси Ноил Лутфуллин ва ўйин комиссари Лазиз Қўчқоров ҳамда клублар вакиллари томонидан муҳокама қилинди.
Унга кўра, мезбонлар бугунги ўйинда қизил рангли либосда майдонга тушадиган бўлишди. "Қўқон-1912" жамоаси эса ҳаворанг либосдан фойдаланади.
“Навбаҳор” – “Қўқон-1912” учрашувида шунингдек, Наманганнинг таниқли санъаткорлари иштирокидаги концерт дастури уюштирилади ва мухлисларга бепул ифторлик егуликлари тарқатилади.
"Навбаҳор" - "Қўқон-1912" клублари ўртасидаги “водий дербиси” бугун “Марказий" ўйингоҳда соат 19:02да бошланади.
