Россия терма жамоаси бош мураббийи Станислав Черчесов Саудия Арабистонига қарши бўлиб ўтгандан кейин матбуот анжуманида иштирок этди.

— Айтингчи, Сизга ким қўнғироқ қилди? (Черчесов матбуот анжумани пайтида зални тарк этганди)
— Мамлакат раҳбари қўнғироқ қилиб, мени ва футболчиларни ғалаба билан табриклади.

— Дзагоевнинг жароҳати борасида янгилик борми?
— У эртага тиббий кўрикдан ўтади ва унинг натижаларини кутамиз. Шундан сўнг бирор нарса дейиш мумкин.

— Ушбу ғалабадан кейин футболчилар ҳаволаниб кетишидан хавотир олмайсизми?
— Мутлақо йўқ. Қандай мақсад йўлида ҳаракат қилаётганимизни аниқ биламиз. Бугун эрталаб футболчилар билан суҳбатда таъкидлагандим: бугунги ўйин билан мусобақа якунланмайди. Ўйин биз учун муваффақиятли чиқди. Конфедерациялар кубогидаги тажриба бизда бор. Ўшанда 2:0 ҳисобидаги ғалаба бизга етарли бўлмаганди. Биз яхши тайёргарлик кўрдик. Бугунги ўйин тўғри йўлдан кетаётганимизни кўрсатиб берди. Лекин кейинги ўйинга тайёргарлик кўришимиз керак. Эртага Миср терма жамоасининг ўйинини кўрамиз ва тайёргарликни давом эттирамиз. Муҳаммад Салоҳ ўйнайдими ёки йўқми, билмадим, аммо рақиб жамоа таркиби савияли футболчилардан ташкил топган.

— Учинчи голдан кейин ҳиссиётларингизни кўпроқ намойиш қилдингиз. Сизни жиддий қиёфада кўриб ўрганиб қолгандик.
— Кеча, ўтган куни, бугун ва бундан кейин мени боримча кўрасиз. Ишим шунақа: баъзида мухлисларга қувонч улашамиз, баъзида йўқ. Ўз футболчиларимга ишонаман ва улар билан ишлаш менга мароқ бағишлайди.

— Рақиб жамоа мураббийи Россия уни ҳайрон қолдирмаганини таъкидлади.
— У қисман ҳақ. У нимани назарда тутганини тушундим. Биз аввалгидек прессинг қилдик, стандартдан гол урдик. Лекин жипсроқ, тартиблироқ ва тажовузкор ўйнадик.