Футбол бўйича 21-жаҳон чемпионати якунига етди. Финалда Франция терма жамоаси Хорватияни мағлуб этиб, икки карра жаҳон чемпионига айланди.

Далич жамоаси ўйинни тажовузкорлик билан бошлади. Улар баҳс бошиданоқ тўпни кўпроқ назорат қилиб, ҳужумлар ташкил этишди. Франция эса шошмади, ўз вақтини кутди. Баҳснинг 18-дақиқаси Дешам жамоаси учун омадли келди. Гризманн жарима тўпини айланма зарба билан ўйинига киритди. Тўп Манжукичнинг бошига тегиб, дарвозанинг олис юқори бурчакка кириб кетди.

Айнан мана шу гол французлар учун анча қулай ҳолатни тақдим этди. Франция ўйинни бошлаган тактика билан баҳсни давом эттирадиган бўлди. Хорватия эса орадан атиги 10 дақиқа ўтиб ҳисобни тенглаштирди. Раиктич жарима тўпини жарима майдончасининг ўнг томонига етказди. Хорватиялик футболчи бош билан тўпни рақиб жарима майдончасига етказди. У ерда хорватлар тўп учун курашда 3 марта рақибдан устун келишди. Модричнинг пасидан кейин Перишич жарима майдончаси чизиғи устида тўпни қабул қилиб, Канте алдади ва чап оёқда кучли зарба берди. Тўп олис бурчакка кириб кетди, 1:1.

Орадан кўп ўтмасдан ўйин тақдирини ҳал қилган яна бир вазият рўй берди. Бурчакдан етказилган узатмага сакраган пайтда тўп Перишичнинг қўлига тегиб, устун ёнидан ўтиб кетди. Нестор Питана дастлаб VAR бўйича мутахассис билан махсус алоқа орқали гаплашди. Сўнг у видеотакрорлар намойиш этиладиган экран олдига бориб, қайта-қайта томоша қилиб, пенальти белгилашга қарор қилди. Гризманн эса 11 метрли жарима зарбасини аниқ амалга ошириб, "учранглилар"ни ҳисобда олдинга олиб чиқди.

Хорватия иккинчи бўлимни ҳам ҳужумкорлик билан бошлади. Аммо бу сафар французлар голга тортадиган вазиятларни кўпроқ яратишди ва улардан ўта самарали фойдаланишди. Учрашувнинг 52-дақиқасида Мбаппе ўнг қанотда Видадан катта тезликда ўтиб кетиб, ўткир бурчак остида яккама-якка вазиятга чиқди ва зарба берди. Субашич оёқлари билан зарбани қайтарди. Орадан 7 дақиқа ўтиб Дешам шогирдлари ҳисобдаги фарқни оширишди. Поль Погба рақиб жарима майдончаси ташқарисидан 2 марта зарба берди. Дастлабки зарба ҳимоячига тегиб қайтди. Иккинчи зарбадан кейин тўп дарвоза бурчагига бориб тушди.

Ушбу гол хорватларнинг шаштини пасайтирмасликнинг иложи йўқ эди. Бундан эса Франция яна фойдаланиб қолди. Килиан Мбаппе олис масофадан дарвозани ишғол қилди! Субашич зарба қаршисида ожиз қолди — 4:1.

Уго Льорис бироз эртароқ ғалабага ишониб юборди шекилли, "қовун" тушириб қўйди. Дарвозабон ўз ҳимоячисидан тўпни қабул қилиб, олдига яқинлашаётган Манжукични алдамоқчи бўлди. Марио тўпга оёқ қўйдию, дарвозани ишғол қилди!

Мазкур голдан кейин ўйинга интрига қайтгандек бўлди, аммо қолган дақиқаларда Франция терма жамоаси метин ҳимояни юзага келтирдики, хорватлар ҳеч нарса қила олишмади.

Натижада Франция терма жамоаси ўз тарихида иккинчи марта жаҳон чемпионлигини қўлга киритди. Хорватия эса 1998 йилги бронзадан кейин ўз музейларига кумуш медални қўшиб қўядиган бўлишди.

ЖЧ-2018. Финал
Франция – Хорватия 4:2 (2:1, 2:1)
Голлар: 1:0 – 18, автогол Манджукич, 1:1 – 28 Перишич, 2:1 – 38, пенальти Гризманн, 3:1 – 59 Погба, 4:1 – 65 Мбаппе, 4:2 – 69 Манджукич.
Франция – Льорис, Варан, Люка Эрнандес, Павар, Умтити, Канте (Нзонзи, 55), Погба, Матюиди (Толиссо, 73), Гризманн, Жиру (Фекир, 81), Мбаппе.
Хорватия – Субашич, Ловрен, Стринич (Пьяца, 81), Врсалько, Вида, Ракитич, Брозович, Перишич, Модрич, Ребич (Крамарич, 71), Манджукич.
Огоҳлантиришлар: Канте (27), Люка Эрнандес (41), Врсалько (90).