«Лос-Анжелес Гэлакси» ҳужумчиси Златан Иброҳимович Англия термасининг собиқ футболчиси Дэвид Бекхэмдан гаровда ютқазганини тан олди.
«Дэвид, биз гаров бойлагандик. Мен ютқаздим. Энди Англия термасининг «Уэмбли»даги ўйинига инглизлар либосида келиб, «фиш-энд-чипс» ейман. Фақат мағлубиятдан кейин бироз нафас ростлаб олишимга ва тинчланишимга вақт бер. Ҳаммаси жойида. Ўйинни сабрсизлик билан кутаман», - деган Иброҳимовичдан иқтибос келтирмоқда BBC.
Иброҳимович ва Бекхэм 7 июль куни бўлиб ўтган ЖЧнинг чорак финал доирасидаги Англия – Швеция баҳси олдидан гаров ўйнашганди. Бекхэмнинг таклифи билан ўйналган гаров шартига кўра, Швеция терма жамоаси ғалаба қозонган тақдирда у ҳамкасбига Лос-Анжелесдаги дала-ҳовлиси учун «Икеа» дўконидан мебел сотиб олиб бериши керак бўларди. Швеция ўйинни бой берса, Иброҳимович Англиянинг «Уэмбли»даги ўйинига шу терма жамоа либосида келиши ва бир порция «фиш-энд-чипс» ейиши керак эди.
Маълумот ўрнида айтиш жоиз, “Fish and chips” инглизларнинг анъанавий таомларидан бири бўлиб, қайлага ботириб қовурилган балиқ гўшти ва иссиқ картошка чипсини ўз ичига олади.
