Хабарингиз бор, жорий йилнинг август ойида Жакартада навбатдаги Осиё ўйинларига старт берилади. Ушбу мусобақанинг футбол спорт тури бўйича мамлакатимиз шарафини Равшан Ҳайдаров бошчилигидаги футболчиларимиз ҳимоя қилишади. Бугун олимпия терма жамоамизнинг навбатдаги йиғин учун кенгайтирилган таркибда «Насаф»дан 9 нафар футболчи чақирилган, шулардан 4таси (Азизжон Ғаниев, Дониёр Нарзуллаев, Одил Ҳамробеков ва Бобир Абдихолиқов) терма жамоа билан Жакартага жўнаб кетишади.

Ушбу футболчилар «аждарлар»нинг бугунги кундаги етакчи футболчилари ҳисобланишади. Хўш, агар улар терма жамоа билан Индонезияга кетса «Насаф» Суперлиганинг сўнги 3 та турида нима қилади? Бу саволга жавоб олиш мақсадида жамоа бош мураббийи Рўзиқул Бердиев билан боғландик:

-Албатта, бу футболчилар асосий таркиб ўйинчиларимиз саналишади, уларсиз жамоага чинакамига қийин бўлади. 
Воқеалар ривожи қандай тус олишини вақт кўрсатади, агар ПФЛ ўйинлари Осиё тур ўйинлари бошлангунига қадар ёки тугагач ўтказса, бу яхши, аммо иккита мусобақа ҳам параллел равишда олиб борилса, «Насаф» анча қийналади, шу сабабдан раҳбарият билан келишган ҳолда, ўз ҳуқуқларимиздан фойдаланиб, ўйинларни қолдиришни сўраб расмий хат билан ПФЛга мурожаат қиламиз, -дейди Рўзиқул Саъдуллаевич SPORTS.uz мухбири билан бўлган суҳбатда.