Тошкентда йиғинга киришган Ўзбекистон U17 термаси 10 ва 11 сентябрь кунлари ўртоқлик ўйинларида иштирок этади.    10 сентябрь куни 18:00 да футболчилар Про-Лига “Б” зонасида пешқадам бўлиб турган “Нурафшон” клубига қарши саф тортади. Учрашув “Миллий стадион” қошидаги академия майдонида бўлиб ўтади.    Отабек Ғуломхўжаев жамоаси бунга қадар ҳам “Нурафшон” клубига қарши икки бор кураш олиб борган. Аввалги йиғинлар доирасидаги ўйинларнинг бирида ҳисоб очилмаган бўлса, яна бирида терма футболчилари 1:0 ҳисобида устун келган. Бу сафарги тўқнашув янги чақирув олган футболчиларни синаб олиш ҳамда аввалги футболчилар ўйинидаги ўзгаришларни аниқлаб олиш учун керакдир.    Эртага — 11 сентябрь куни 10:00 да “Бунёдкор” ёшлари Ўзбекистон U17 жамоасига рақиб бўлади. Шуҳрат Мақсудов бошчилик қилаётган жамоага қарши беллашувга ҳам “Миллий стадион” қошидаги академия майдони мезбонлик қилади.    Бош мураббий режасига кўра, йиғиннинг сўнгги куни — 13 сентябрда жамоа аъзолари тенг иккига бўлинади ҳамда назорат учрашуви ўтказилади. Бу беллашув 10:00 га тайин қилинган. Айни вақтда йиғинда бўлиб турган футболчилардан иккита тенг таркиб ясаш мумкин.