Toshkentda yig‘inga kirishgan O‘zbekiston U17 termasi 10 va 11 sentyabr kunlari o‘rtoqlik o‘yinlarida ishtirok etadi.    10 sentyabr kuni 18:00 da futbolchilar Pro-Liga “B” zonasida peshqadam bo‘lib turgan “Nurafshon” klubiga qarshi saf tortadi. Uchrashuv “Milliy stadion” qoshidagi akademiya maydonida bo‘lib o‘tadi.    Otabek G‘ulomxo‘jayev jamoasi bunga qadar ham “Nurafshon” klubiga qarshi ikki bor kurash olib borgan. Avvalgi yig‘inlar doirasidagi o‘yinlarning birida hisob ochilmagan bo‘lsa, yana birida terma futbolchilari 1:0 hisobida ustun kelgan. Bu safargi to‘qnashuv yangi chaqiruv olgan futbolchilarni sinab olish hamda avvalgi futbolchilar o‘yinidagi o‘zgarishlarni aniqlab olish uchun kerakdir.    Ertaga — 11 sentyabr kuni 10:00 da “Bunyodkor” yoshlari O‘zbekiston U17 jamoasiga raqib bo‘ladi. Shuhrat Maqsudov boshchilik qilayotgan jamoaga qarshi bellashuvga ham “Milliy stadion” qoshidagi akademiya maydoni mezbonlik qiladi.    Bosh murabbiy rejasiga ko‘ra, yig‘inning so‘nggi kuni — 13 sentyabrda jamoa a’zolari teng ikkiga bo‘linadi hamda nazorat uchrashuvi o‘tkaziladi. Bu bellashuv 10:00 ga tayin qilingan. Ayni vaqtda yig‘inda bo‘lib turgan futbolchilardan ikkita teng tarkib yasash mumkin.