PEPSI Суперлига 23-тур “Қўқон-1912” – “Насаф” учрашувидан кейинги матбуот анжуманининг иккинчи қисмида мезбонлар устози Нўъмон Ҳасанов ва “Қўқон-1912” етакчиларидан бири Ўткир Юсуповлар қатнашишди.

“Ўйин чиройли, шиддатли руҳда бўлди. Футболчилар яхши ўйнашди. Барча борини бериб ҳаракат қилди. Сидиқовнинг голи жуда чиройли чиқди. Фақат гол ўтказворган вазиятда футболчиларимиз бироз мувозанатни йўқотишди.

Бугун дуранг ўйнаган бўлсак-да, футболчиларимизга раҳмат айтаман. Бугун бизни қўллаб-қувватлаб турган мухлисларимизга ҳам ўз миннатдорчилигимни изҳор этаман.

Ўйин мухлисларга ёқди деб ўйлайман. Такрор айтаман, суперлигадаги ҳар бир учрашув шундай шиддатли ўтади. Бунга бугун яна бир бор гувоҳ бўлдик.

Жамоам бугун икки таймда икки хил тактикада ўйнади. Албатта ўнг қанот ҳимоясида Мурод Ҳолмуҳаммедовнинг йўқлиги билинди.

Ойбек Рустамов терма жамоадан келди, балки шунинг учун бироз киришиб кетиши қийин бўлгандир”, - дейди Ҳасанов.

Ўткир Юсупов: Ўйин мухлисларга ёқди, деб ўйлаймиз. Мураббийларимиз кўрсатмаларини бажаришга интилдик. Лекин хатога йўл қўйдик. Хатоларимиз устида ишлаймиз. Кейинги баҳсларда ишқибозларимизни хурсанд қилишга ҳаракат қиламиз.