"Реал Мадрид" клуби академияси ва ЎФА ўртасида тузилган келишувга асосан мадридлик мутахассислар томонидан танлаб олинган 22 нафар бола Real Madrid Foundation Clinic дастури бўйича мастер классларда иштирок этиб, тажрибаларини ошириш мақсадида Испаниянинг Мадрид шаҳрига жўнаб кетгани ҳақида хабар берган эдик.

“Реал” клуби академиясида хорижлик мутахассислар қўл остида машғулот ва мастер классларда иштирок этаётган футболчиларимиз Мадрид шаҳри бўйлаб саёҳатга чиқишди. Дастлабки ташриф “Реал” стадиони ҳамда музейига бўлди.

“Реал” клуби музейига ташриф буюрган болаларга махсус бириктирилган ходим, музей хоналари, музейдаги экспонатлар, клуб тарихи, клубга меҳнати сингган футболчилар, ходимлар билан таништирди. Музейдаги экспонатлар, музей ҳақидаги маълумотлар ўзбекистонлик ёш футболчиларда жуда ҳам катта қизиқиш уйғотди. Болалар ўзларини қизиқтирган саволлар билан музей ходимига мурожжат қилиб, ўзларига керакли маълумотларни олдилар.

Шундан сўнг “Реал” стадионига ташриф амалга оширилди. Стадионнинг кийим алмаштириш хоналари, машғулот майдони, асосий стадион, ҳамда бошқа бинолар билан танишишди. “Сантяго Бернабеу”нинг ресторанига киришганда, стадион мутасаддилари томонидан уларга сюрприз тайёрлаб қўйилган экан. Улар ушбу ресторанда “Реал” мутахассислари билан биргаликда байрамона тушлик қилдилар.

Стадион ҳамда музей билан танишиб бўлгач, болалар Мадрид шаҳридаги тарихий обидалар, диққатга сазовор жойлар билан танишишди. Саёҳат яхши ўтиши учун клуб томонидан барча қулайликлар яратиб берилди. Ушбу саёҳат болаларнинг бир умр ёдларида қолиб, уларнинг футболга бўлган қизиқишларини орттириши шубҳасиз.

Бугундан бошлаб, “Реал” академиясида ўтказилаётган машғулотлар давом эттирилади.